發達夢....

今期六合彩又係中得2個字(仲要分開兩注中)，諗諗下我都好似2年無響馬會手上攞過錢....

幫親左馬會咁耐，我都係買下六合彩，世界杯先會買下波仔，貪佢唔駛諗，唔駛好似人地買馬咁度黎度去，最近連寫都懶，買電腦飛:p

好似我依D咁o既打工仔，發達的希望現時都係放左係佢身上，事關人工低，又無咩儲錢的能力....唔駛指意投資咩股票、期指.....
放工之後都無咩時間又或者係無咩心情做part time了......

想跳出個返工放工等出糧的輪迴，除左等我老闆皇恩浩蕩加人工同出多D bonus 之外唔知又有幾多人同我一樣期期都係希望中多幾個字呢?

我都只係想多一點時間係屋伴下家人，等父母生活得好一點，不竟兩老供由幼稚園開始供書教學，到在下讀完個爛鬼學士，真係花左唔少時間、心力同銀紙。

但係到佢地個仔出到社會混之後，佢地先發覺原來之前做咁多野，都只係為左個仔可以賣比老闆們時賣到多個錢。但係佢地個仔又鮮遇到一個好老闆。佢地仲發現佢地個仔係買斷左比人，好日都唔會見到個仔係屋企，除左佢病....

故事來到依到，佢地個仔仲未死，仲脫離左個仆街老闆同份如果計時薪低過M記的工，去左做一份好得閒的工，日日都可以準走人，返工都好得閒下又可以發下白日夢等運到，不過佢地個仔又唔係好高興，因為公司只係叫佢執頭執尾，做D無咩人願意做的野.....個個仔係度諗，如果佢再咁落去，公司幾時先會有得升職加薪(辛)?眼見有唔多同事都係係度磨時間，自己磨多一兩年之後又會唔會好似佢地咁，想走都走唔係咁易?最重要係個仔係果度做唔到佢自己想做的野，做到個心都灰晒....同埋覺得有愧於父母...

個個想發達的人都有自己的理由，但係要靠中六合彩先有機會發達的理由到底係唔係悲哀?
明知六合彩係輸多過贏的仲要期期去買的理由又係咩野呢?

下期我一定要再買...因為我今個星期的weekend又要開夜...同埋今朝無端端比個客同的士司機晨早小左兩鑊...同埋一定要中XD